SARANGANI- Gipalig-on sa lokal nga panggamhanan sa Alabel, Sarangani Province, ang seguridad ug kaluwasan sa tanang pampubliko ug pribadong eskwelahan pinaagi sa pag-isyu ni Mayor Lilibeth “Ybing” J. Salarda sa Executive Order No. 58, Series of 2026, nga nagsagop sa School Security and Safety Plan.
Sakop sa maong plano ang tanang institusyon sa edukasyon, lakip ang mga child development center, pre-school, elementarya, sekondarya, ALS center, technical-vocational institution, kolehiyo ug unibersidad.
Ubos sa maong direktiba, gikinahanglan ang hugot nga pagkontrol sa mga entrada ug gawasanan sa eskwelahan, samtang ang mga bisita kinahanglan moagi sa gitakdang entrada, mopaila sa ilang kaugalingon ug mosunod sa mga pamaagi sa seguridad.
Lakip usab sa mga lakang ang paggamit sa CCTV sa mga komon nga lugar ug mga entrada, ingon man ang lima ka minutong inspeksiyon sa mga bag ug pagsusi sa kaluwasan sa mga classroom sa dili pa magsugod ang matag klase, nga kinahanglang himoon sa makatarunganon ug matinahurong paagi.
Gidili usab ang pagdala sa mga armas nga walay pagtugot, eksplosibo, delikadong armas ug uban pang gidili nga mga butang sulod sa mga pasilidad sa eskwelahan.
Gipunting usab niini ang papel sa mga barangay tanod ug mga opisyal sa kaluwasan sa pagmonitor sa palibot sa mga eskwelahan, pagtabang sa pagdumala sa trapiko ug pagreport sa mga suspetsadong kalihokan ngadto sa mga awtoridad.
Giawhag ang mga barangay nga magbutang og mga tanod sa mga entrada ug palibot sa mga eskwelahan labing menos 30 minutos sa dili pa magsugod ang mga klase sa buntag ug hapon, kon gikinahanglan.
Samtang, ang Municipal Disaster Risk Reduction and Management Office o MDRRMO maoy manguna sa koordinasyon sa nagkalainlaing ahensiya aron masiguro ang hapsay nga pagpatuman sa mga lakang sa seguridad ug kaluwasan sa tanang eskwelahan sa Alabel.
