GENERAL SANTOS CITY — Giila nga natural death ang hinungdan sa kamatayon ni Ronnell “Cathy” Rivera, 37 anyos, usa ka miembro sa LGBTQ community ug residente sa Purok 2C, Barangay Katangawan, human kini makit-i nga patay sa ilang balay niadtong Hulyo 1, 2025.
Base sa opisyal nga progress report sa Police Station 8 sa General Santos City Police Office (GSCPO), si Rowena R. Guevarre, 42 anyos, kasado, LYR agent, ug igsuon sa biktima, mipadayag sa istasyon ug nagpresentar sa death certificate nga naghisgot nga ang hinungdan sa kamatayon sa iyang igsoon kay suspected drug-induced encephalopathy sumala sa findings ni Dr. Russel C. Gonzales, Medico-Legal Officer sa GenSan, niadtong Hunyo 23, 2025.
Sa imbestigasyon sa Scene of the Crime Operatives (SOCO), nakit-an sa crime scene ang usa ka sachet nga gituhuang shabu ug pipila ka gigamit nga aluminum foil, nga nagpalig-on sa impormasyon nga ang biktima usa ka PWUD (Person Who Use Drugs) sa maong barangay.
Wala sab makit-i nga ebidensya sa pugos nga pagsulod sa balay sa biktima, ug wala usab nawala nga mga butang o personal items, ni walay samad nga nakita sa lawas sa biktima nga magpaila og posibleng foul play.
Tungod sa maong findings, girekomendar sa buhatan sa kapulisan nga ideklarar ang insidente isip natural death, aron kini malimpyuhan sa CIRAS (Crime Information Reporting and Analysis System) ug ubang record sa kapulisan.
Padayon ang panawagan sa kapulisan sa publiko nga magtinabangay sa pagsumpo sa illegal nga droga ug ipahibalo dayon sa mga awtoridad kon adunay kahina-hinalang kalihokan sa ilang komunidad.
