GENSAN – Nakaplagang patay sa sulod sa iyang pinuy-anan sa Purok 2C, Barangay Katangawan, ning dakbayan sa Heneral Santos ang usa ka miyembro sa LGBTQ community, pasado alas 5:30 sa hapon karong Hunyo 19, 2025.
Giila ang biktima nga si Ronnel Fernandez Rivera, 37-anyos, single, walay trabaho.
Sumala sa imbestigasyon sa kapulisan, nakadawat sila og tawag gikan sa usa ka nabalakang residente kabahin sa baho ug kahimtang sa usa ka balay nga dugay nang wala’y kalihukan. Pag-abot sa mga otoridad, ilang naabtan ang lawas ni Rivera nga gialirongan na sa advanced state of decomposition, nga nagpasabot nga dugay na kining namatay.
Sa inisyal nga tan-aw sa lugar, wala’y timailhan sa pwersadong pagsulod. Gikumpirma usab sa mga otoridad nga anaa sa kiliran sa biktima ang iyang cellphone ug ubang mga personal nga butang.
Apan, usa sa nakapukaw og interes sa mga imbestigador mao ang nakitang usa ka sachet nga adunay ‘ crystalized substance nga suspetsadong shabu, usa ka lighter, ug pilit nga aluminum foil nga sagad gamiton sa paggamit og illegal nga druga.
Gipaabot sa kapulisan ang opisyal nga findings sa SOCO ug ang posibleng resulta sa autopsy aron matino ang hinungdan sa kamatayon ni Rivera.
Sa kasamtangan padayon pa ang imbestigasyon sa GSCPO ug wala pa kini kumpirmasyon kun aduna bay foul play nga nahitabo.
