Giduso ni Leyte 1st District Representative ug House Speaker Ferdinand Martin Romualdez ang House Bill No. 7, nga ang tumong sa pag-amenda sa Bank Secrecy Law aron mapugngan ang paggamit sa Pilipinas isip taguanan sa mga illegal nga kwarta nga gikan sa money laundering, tax evasion ug korapsyon.
Sumala ni Romualdez, dili na angay mahimong safe haven ang Pilipinas alang sa mga criminal nga gustong itago ang ilang “dirty money.”
Matud pa niini nga outdated na ang kasamtangang probisyon sa Republic Act 1405, ug gi-abuso sa mga tawo nga nalambigit
sa illegal nga aktibidad sa pinansyal.
Tuyo sa maong sugyot balaodnon nga palig-onon ang gahum sa mga financial regulators, aron mas epektibong makapakigbatok sa korapsyon, panikas, ug ubang krimen may kalabutan sa kwarta.
Gikadugang pa ni Romualdez nga lisod para sa mga imbestigador ug regulators nga matultulan ang mga ilegal nga kalihokan, tungod kay protektado pag-ayo sa kasamtangang balaod ang mga bank account, lakip na ang mga foreign currency deposits.
Sa ilawom sa House Bill No. 7, tugotan na ang Bangko Sentral ng Pilipinas (BSP) nga muusi sa mga bank deposits, lakip ang foreign currency accounts, ilawom sa hugot ug limitadong kondisyon, kung adunay lig-on nga basehan sa ilegal nga kalihokan.
Lakip usab sa sugyot nga pinalig-on nga silot alang sa mga mulapas sa balaod lakip na ang pagkapriso nga gikan sa duha hangtod 10 ka tuig, ug multa nga muabot sa P50,000 hangtud P2 milyon.
