Posibleng maatubang sa sanctions ang legal team ni Guo Hua Ping alias Alice Leal Guo gikan sa Department of Justice tungod sa pagsumite og pekeng counter-affidavit sa iyang giatubang nga qualified human trafficking case.
Kini ang gibutyag ni Justice USec. Nicholas Ty human sa pag-angkon ni Guo sa pagdungog sa Senado niadtong Martes nga gipirmahan niya ang maong counter-affidavit una misibat sa nasud kaniadtong Hulyo apan gipanotaryo lang kini kaniadtong Agosto 14, panahon nga wala na sa nasud si Guo.
Base sa jurisprudence, dili angayang i-notaryo sa public notary ang usa ka dokumento gawas kung ang tawo nga mupirma niini mao ang mismong tawo nga nagpahigayon niini og personal nga miatubang sa nag-notaryo aron pamatud-an ang unod ug kamatuoran sa mga nalatid sa dokumento.
Kalabot niini, gibutyag sa DOJ official nga ang isyu dinhi mao ang kabahin gayud sa counter-affidavit, dili lang sa notarization.
Hinungdan nga dili lang matod pa si Atty. Elmer Galicia nga nag-notaryo sa counter-affidavit kun dili bisan ang mga abogado ni Guo ang angayang manubag tungod gikan kanila ang counter-affidavit, sila usab ang nag-attach niini sa motion to admit, og sila usab ang nahimong kabahin sa record sa DOJ.
Gibutyag pa ni USec. Ty nga nakapahimulos ang mga abogado ni Guo gikan sa counter-affidavit tungod nagresulta kini sa pagkalangan sa kaso.
Wala usab duda nga peke ang maong counter-affidavit og dili angayang sundon ang susamang pamaagi sa mga abogado ni Guo.
Sigurado usab nga adunay ipasaka ang DOJ sa Korte Suprema nga disciplinary case alang sa mga posibleng misbehavior sa mga abogado ni Guo.
