Nagkasabot ang Lebanon ug Israel sa shortlist sa mga nasud nga mahimong ipadala aron mo-verify sa pagdis-arm sa Hezbollah, ubos sa brokered agreement sa Estados Unidos.
Sumala sa usa ka opisyal sa Lebanon niadtong Biyernes, ang Estados Unidos na ang mopili gikan sa maong shortlist kung kinsa nga mga nasud ang mahimong moapil sa verification process.
Wala gibutyag sa opisyal kung pila ka nasud ang naa sa shortlist ug kung unsa kini nga mga nasud.
Apan sumala sa laing Lebanese official ug duha ka foreign diplomats nga kaniadto misulti sa Reuters, gi-veto sa Israel ug Estados Unidos ang France isip posibleng moapil sa maong proseso.
Naporma ang shortlist atol sa mga meeting tali sa Lebanon ug Israel sa US Embassy sa Rome ning semanaha.
Kabahin kini sa padayong panaghisgot bahin sa implementasyon sa kasabutan niadtong Hunyo 26, diin nalambigit ang hinay-hinay nga pag-atras sa mga tropang Israeli gikan sa Lebanon ug ang pagdis-arm sa Hezbollah.
Matud sa Lebanese official, ang mga partido nagtakda kung kinsang mga nasud ang dili madawat ug kinsa ang mahimong potensyal nga moapil. Ang Estados Unidos na ang magdesisyon ug posible usab nga labaw sa usa ka nasud ang pilion.
