SARANGANI- Human sa pipila ka adlaw nga walay hunong nga pagpangita, narekober sa mga rescuers ang lawas ni Wilbert Novio, 27 anyos, residente sa Barangay Congan, Glan, kagahapong adlawa, Hunyo 18.
Ang operasyon gipangulohan sa mga espesyal nga pwersa sa Bureau of Fire Protection (BFP) ug Philippine Coast Guard (PCG). Nahitabo ang pagrekober usa ka adlaw human makita ang patay niyang kanding sa eksaktong lugar diin siya katapusang nakita.
Matud ni Fire Chief Inspector Ezekiel Tabon, Tagum City Fire Marshal nga gipadala sa Glan aron mangulo sa search and rescue operations, adunay pagbati ang pamilya ni Novio ug ang mga responder nga makita ra gyud ang iyang lawas human makit-an ang kanding.
Si Novio gikatahong nag-atiman sa iyang kanding sa daplin sa bakilid sa dihang miigo ang magnitude 7.8 nga linog niadtong Hunyo 8. Sumala sa mga silingan, bisan sa pag-uyog sa yuta ug pagdahili sa bakilid, nakasinggit pa siya og “Dagan mo!” aron pasidan-an ang mga tawo sa palibot sa wala pa siya matabonan sa landslide.
Gibanabana sa mga rescuers nga nalubong ang iyang lawas sa giladmon nga 15 hangtod 20 feet. Gigamit ang mga heavy equipment sa paglimpyo sa ubos nga bahin sa landslide area, samtang manwal nga nagkalot ang mga responder ug mga sakop sa pamilya aron maabot ang iyang lawas.
Miingon si Tabon nga gawas sa ilang katungdanan isip mga responder, nag-ampo usab sila nga makita ang lawas ni Novio aron mahatagan kini og hustong pag-atiman ug makahatag og kahupayan sa iyang pamilya.
Gipasidunggan usab ni Tabon ang koordinadong paningkamot sa nagkadaiyang ahensya sa gobyerno, lakip ang Philippine Coast Guard, Special Rescue Forces gikan sa Region 10, Region 11, Region 12, BARMM ug Caraga, ingon man ang mga responder sa Municipal Disaster Risk Reduction and Management Office (MDRRMO).
Sa kasamtangan, bug-os nang gi-aktibo ang Incident Command System (ICS) sa Glan ug sa tibuok Sarangani aron mas sistematiko ang pagdumala sa mga biktima sa kalamidad.
Matud ni Melencio R. Balanag Jr., Municipal Local Government Operations Officer sa Malapatan nga nagtabang sa provincial ICS, gilunsad usab ang Management of the Dead and Missing (MDM), usa ka sistema nga nakatutok sa hustong pagdumala, pag-ila ug pagdokumento sa mga namatay ug nawala panahon sa kalamidad.
Human marekober, gidala ang lawas ni Novio sa Poblacion, Glan diin gihimo ang postmortem examination sa Municipal Health Officer.
