GENSAN– Napatay sa mga sakop sa Makar Police Station ang usa ka 42-anyos nga mekaniko human kini misukol ug nakigpinusilay sa mga otoridad sa Purok Pandian, Barangay Labangal, General Santos City pasado alas 11 sa buntag,ning adlawa, Abril 18.
Sumala ni PMAJ Ari Noel Cardos, station commander sa Makar Police Station, miresponde ang iyang team sa report sa indiscriminate firing tungod sa selos, apan imbes nga mosurender, napabuto hinuon ang suspek gamit ang iyang caliber .45 nga pistola samtang misulay sa pag-ikyas.
Atol sa clearing operation, narekober gikan sa sling bag sa napatay nga suspek ang duha ka sachet sa gidudahang shabu ug mga drug paraphernalia, samtang gikasubo usab ang pagkamatay sa usa ka 11-anyos nga batang babaye nga nadamay.
Sa pagkakaron, gihingusgan sa Internal Affairs Service (IAS) ang pagpahigayon og motu proprio investigation ug gipaabot pa ang ballistics report gikan sa Forensic Unit aron masuta kung kinsang bala gyud ang nakaigo sa bata.
Bisan pa man sa inisyal nga obserbasyon nga naggikan ang bala sa direksyon sa suspek base sa mga entry points sa kawayan, magdepende gihapon ang final nga resulta sa siyentipikong eksaminasyon ug sa mga affidavit nga gisumite sa mga mirespondeng personnel.
