GENERAL SANTOS CITY – Patay ang usa ka lalaki human gidunggab, nga gituuhang natigayon kagabii atul sa disperas sa Pasko.
Sa report, nakaplagan ang nagkadugo nga biktima nga si Richard Ancala, 26-anyos, taga-Prk Buan, Brgy Sinawal ning siyudad, alas-2:25 kaganihang kaadlawon nga may mga samad-dinunggaban nga gikabutyag nga pinaagi sa ice pick, sa nasampit nga lugar.
Gilayon kining gidala sa Dr. Jorge P. Royeca Hospital, apan gideklarang dead on arrival sa mga doktor.
Gikabutyag nga una ang insidente, nakig-inom una ang biktima. Hinungdan nga gituuhang posibleng usa sa mga naka-inom niini ang midunggab kaniya.
Nasayran nga usa sa iyang samad-dinunggaban ang sa wala nga dughan, sa may bahin sa kasing-kasing. Padayon karon abg imbestigasyon sa kapulisan kalabot sa maong krimen.
Samtang, sa pagsaulog sa bisperas sa Pasko miaging gabii, sa karon wala pay natala nga mga nasamdan o biktima sa pabuto sa mga ospital.
