Giingong nakatagpilaw ang usa ka lalaki tungod sa bugnaw nga aircon sa balay nga iyang gikawatan, hinungdan nga mao’y nakaingon nga nasakpan kini ug daling gidakop sa nasud sa India.
Nasayran nga gi-on niini ang aircon sa iyang gisak-an nga balay ug nikuha pa og unlan aron komportable kini nga makatulog.
Matud sa mga awtoridad, nga wala ang tag-iya sa balay nga si Dr. Sunil Pandey sa dihang nahitabo ang giingong pagpangawat tungod kay nakadestino kini sa laing lugar.
Apan, nakabantay ang mga silingan ni Dr. Pandey nga abli ang gate busa gitawagan dayon nila ang doctor.
Ingon man nga nangayo dayon og tabang ang doktor sa kapulisan aron makasusi sa iyang balay.
Ug wala masayop tungod sa naabtan sa kapulisan ang suspek nga nahinanok sa pagkatulog samtang naggunit sa iyang selpon.
