Nabaligya ang sikat nga NBA team nga Los Angeles Lakers sa kantidad nga $10 billion— ang pinakamahal nga presyo sa usa ka sports team sa kasaysayan sa Estados Unidos, sumala sa taho sa ESPN.
Nasayran nga ang pamilyang Buss, nga nanag-iya sa Lakers sulod sa 47 ka tuig, mibaligya sa ilang kontrol sa team ngadto sa bilyonaryo nga si Mark Walter, kasamtangang minoriya nga tag-iya sa team ug CEO sa TWG Global.
Hinuon, magpabilin si Jeanie Buss isip team governor human mabaligya ang NBA team.
Samtang, si Walter usab ang tag-iya sa Los Angeles Dodgers, Los Angeles Sparks, ug uban pang sports properties.
Matod sa NBA legend nga si Magic Johnson, maayong balita kini alang sa Lakers tungod kay si Walter adunay reputasyon ug kasaysayan sa kadaugan ug liderato.
Kahinumduman nga ang pamilyang Buss nakadala og 11 ka NBA championships sa Lakers sukad niadtong 1979, apil na ang mga panahon nga sila si Magic Johnson ug Kobe Bryant ang nangulo niini.
