GENERAL SANTOS CITY – Laing pambato sa dakbayan ang nakasakmit ug pasidungog human midaog sa Mr. Philippines 2018.
Kini human sa dili pa lamang dugay natigayon nga coronation night didto sa Quezon City kaniadtong Sabado sa gabii, Agosto 11.
Gikan sa kapin 30 ka mga contestants, mipatigbabaw ang pagkaambungan ug pagkautukan sa pambato sa GenSan nga si Kenneth Sadiang-abay nga maoy gideklarang Mr. Philippines – Mister Grand Universe 2018.
Base sa iyang facebook post human sa nahimong kadaugan, gipasalamatan ni Sadiang-abay ang tanan nga misuporta kaniya, ug nahimong kabahin sa iyang Mr. Philippines journey.
Lakip na niini ang iyang pamilya, mga higala hilabi na dinhi sa siyudad, ug Polomolok, South Cotabato. Kahibaluan nga si Sadiang-abay taga-Polomolok, apan dakong dungog matud pa alang kaniya ang pagrepresenta sa dakbayan sa GenSan.
Kahihaluan nga ang uban pang midaog sa naasoy’ng pageant mao si Junebrix Nuestro gikan sa Rodriguez, Rizal, nga gideklarang Mr. Philippines – Mister National Universe; si Marcky Arellano Yim sa Taytay, Rizal, ang gideklarang Mr. Philippines- Mister Tourism International; si Marvin Valdez gikan sa Salcedo, Ilocos Sur ang Mr Philippines- Mister Tourism Ambassador International; si Nico Angelo Dela Paz nga taga-Marikina City ang gideklarang Mr. Philippines – Mister Model of the World; ug si Clark Charmel Bautista sa San Mateo, Rizal mao ang midaog nga Mr. Philippines – Teen Universal. Samtang first runner-up si Diether Covey Dolinog nga taga Rodriguez, Rizal; 2nd runner-up si Francis John Crudo gikan sa Imus, Cavite; 3rd runner-up si Emmanuel Calisin gikan sa Cagayan; ug 4th runner-up si Ephraim Paul Paran gikan sa CAR.
