Panguluhan ni Senate President Pro Tempore Ping Lacson imbestigasyon sa Senate Blue Ribbon Committee sa mga anomalosong proyekto sa flood control projects sa nasud.
Kini human gikompirma ni Senate President Vicente Sotto III nga si Lacson maoy mohulip kang Senador Rodante Marcoleta isip chairman sa komite.
Gipasabot ni Sotto nga si Marcoleta dili sakop sa majority bloc ug ang Blue Ribbon Committee gitagana lang sa mayorya.
Walay bisan usa sa kasamtangan nga mga lagda, bisan sa Blue Ribbon Committee Charter o sa kinatibuk-ang Senate Rules, nag-ingon nga ang tao nga naglingkod isip chairman sa Blue Ribbon Committee kinahanglan nga usa ka abogado.
Matod ni Sotto, ang pagka sakop sa mayoriya mao lang ang gikinahanglang kwalipikasyon aron mangulo sa nahisgutang komite.
Si Sotto nihatag og example nga atol sa 9th Congress, gipili nila si Senador Sonny Alvarez isip chairman sa Blue Ribbon Committee bisan og dili siya abogado.
Ang Senate President midugang nga ang pagka abogado dili garantiya nga maayo nga imbestigador. Matod niya nga mas maayo si Lacson kon imbestigasyon ang hisgutan.
Samtang, matod ni Sotto, magpabilin si Senador Sherwin Gatchalian isip chairman sa Committee on Finance, nga maoy mangulo sa pagrepaso sa proposed national budget alang sa 2026.
