Mapaslamaton si Senador Panfilo “Ping” Lacson sa malampusong pagbalik sa nasod sa 24 ka Pilipino nga nakulong sa Russia sulod sa siyam ka bulan.
Matud ni Lacson, usa kini sa mga mahinungdanong resulta sa bag-ohay nga pagbisita ni Pangulong Ferdinand Marcos Jr. sa Russia diin personal niyang gidala ngadto kang Russian President Vladimir Putin ang kahimtang sa mga Pilipino.
Sa iyang pahayag, giingon ni Lacson nga ang pagpagawas sa 24 ka Pilipino usa ka dakong kalampusan nga wala nahatagan og atensyon sa publiko.
Sumala kaniya, kung wala maaksiyoni ang ilang sitwasyon, posible nga dugay pa silang magpabilin sa prisohan sa sidlakang bahin sa Siberia.
Miabot sa Ninoy Aquino International Airport (NAIA) Terminal 1 ang 24 ka Pilipino pinaagi sa duha ka batch gikan sa Bangkok, Thailand. Base sa Department of Foreign Affairs, gihimo ang repatriation pinaagi sa pakigtambayayong sa mga otoridad sa Russia, kauban ang Department of Migrant Workers ug Overseas Workers Welfare Administration.
Niadtong Huwebes, gikumpirma ni Pangulong Marcos nga gitugotan ni Putin ang pagpagawas sa mga Pilipino nga nagtrabaho isip cleaners sa Russia. Matud sa unang mga report, nakulong sila tungod sa mga isyu sa immigration human giingong nabiktima sa illegal recruiters.
