Nangulo ang buhatan sa Executive Judge sa Manila Regional Trial Court (RTC) sa isyu sa posibleng paglapas sa notarized document sa usa ka Senate witness nga mitunga sa hearing kaniadtong Septiyembre 25 kalabot sa anomalosong flood control projects.
Kini ang gipahayag ni Senate President Pro Tempore ug Blue Ribbon Committee Chairman Senador Ping Lacson.
Kahinumduman nga nitumaw si Orly Regala Guteza atol sa imbestigasyon sa Senado ug niingon nga siya kanhi Marine ug security consultant ni Rep Elizaldy Co.
Matod ni Guteza nga nagdala matod siya og mga maleta nga adunay kwarta ug gitawag nga “basura”, sa mga balay nila ni Co ug kanhi Speaker Martin Romualdez. Si Romualdez hugot nga gipanghimakak ang maong pasangil.
Ang affidavit nakamugna og kontrobersiya human ang abogado nga si Petchie Rose Espera, kansang ngalan ug mga detalye sa notarial nga makita sa dokumento, mihimakak nga siya ang nag-notaryo o miapil pa sa pagpangandam niini. Giinsister ni Espera nga peke ang iyang pirma ug mga detalye sa notarial.
Si Lacson niinsistir nga kon aksiyonan sa komite ang mga isyu nga may kalabotan sa notarization, sama sa pag-subpoena sa notarial register sa abogado asa ang pirma makita sa affidavit ni Guteza — ma-divert ang dagan sa hearing.
Sa pangutana kon gikinahanglan pa ba sa Blue Ribbon Committee nga imbitahon si Atty. Espera, nitubag si Lacson nga dili na kinahanglan karong panahona.
