Gipangayo sa mga labor groups sa Pasig City Regional Trial Court nga i-lift dayon ang temporary restraining order o TRO nga nagpahunong sa implementasyon sa P85 nga daily minimum wage increase sa Metro Manila.
Matud nila, walay hurisdiksyon ang korte sa maong isyu ug wala usab gisunod sa duha ka construction firms ang hustong proseso sa pag-apelar sa wage increase.
Ang TRO nagpahunong sa unang P60 nga tranche sa wage increase nga gikatakdang ipatuman niadtong Hulyo 25. Giingon sa mga labor groups nga mokabat sa 1.1 milyon ka minimum wage earners sa Metro Manila ang naapektuhan sa delay.
Gibanabana nga P60 milyon nga sweldo ang mawala sa mga mamumuo kada adlaw, o mokabat sa P1.6 bilyon kung molungtad og usa ka bulan ang pagkalangan.
Gisupak usab sa labor groups ang argumento sa usa ka construction firm nga dili nila dayon masustiner ang wage increase tungod sa fixed-price contracts sa ilang mga proyekto.
Gipasidan-an nila nga delikado kung ipadayon ang TRO kay mahimo kining magdasig sa ubang employers nga dad-on sa korte ang ilang mga reklamo batok sa umaabot nga wage increases.
