GENERAL SANTOS CITY – Malampuson ang nahimong unang operasyon nga gipahigayon sulod mismo sa COVID Facility sa General Santos City sa miaging Agusto 25.
Gipahigayon ang emergency central catheter insertion sa usa ka 27-anyos nga babaye nga COVID positive patient isip pagpangandam sa iyang hemodialysis tungod sa renal failure nga komplikasyon usab sa COVID infection.
Sulod na mismo sa COVID Facility gipailawom sa dialysis ang pasyente tungod aduna may dialysis room ang nasampit nga lugar.
Ang operasyon nga wala miabot og usa ka oras gipangunahan ni Dr. Ryan Aplicador, ang mismong chief of hospital sa Doctor Jorge P. Royeca Hospital og assistant task force commander sa Local IATF sa lungsod.
Nasuta nga ang COVID Facility sa GenSan adunay kaugalingon nga exclusive operating room alang sa mga pasyente sa COVID.
Aduna usab eksklusibo nga labor room, dialysis room, radiology capabilities, og nursery room.
Bulag kini sa uban nga mga pasilidad sa Doctor Jorge P. Royeca Hospital.
Nagpasalamat si Dr. Aplicador sa mga staff og doctors sa COVID facility tungod nahimong nindot ang ilang pag-andam sa mga sama nga operasyon.
