Wala pa matino kung madayon ba ang labing una nga Bangsamoro Autonomous Region in Muslim Mindanao (BARMM) Parliamentary elections nga gikatakda karong Oktubre 13.
Kini human ang Korte Suprema nagpagawas og Temporary Restraining Order (TRO) kalabot sa balaod nga nag-redistrict sa pito ka mga puwesto nga orihinal nga gitagana sa Sulu.
Matod ni COMELEC Chairman George Erwin Garcia, gisuspenso sa komisyon ang tanang preparasyon sa eleksiyon hangtod nga mapagawas ang final nga desisyon sa Korte Suprema. Napadala na sa BARMM ang mga balota ug automated counting machines, apan nagpabiling suspendido ang operasyon samtang nagpaabot sa kaso.
Kung ang Korte Suprema makahukom nga ipatuman ang probisyon sa Bangsamoro Autonomy Act No. 77 nga adunay kinatibuk-an nga 80 ka mga parliamentary seat, ang poll body kinahanglan nga maghimo ug bag-ong mga pagpangandam. Kini tungod kay ang plano karon sa Comelec nagtutok lang sa 73 ka mga puwesto.
Alang sa Bangsamoro Transition Authority (BTA), ilang gitahod ang gipagawas nga TRO apan niinsistir nga wala kini magpasabot nga unconstitutional ang bag-ong balaod nga ilang gipasar.
Sa laing bahin, wala isalikway sa Comelec ang posibilidad nga mangayo sila og dugang pondo kon ma-postpone na usab ang eleksiyon. Lakip sa gikinahanglang galastohan gikan sa sinugdanan mao ang reconfiguration sa automated election system, pag-abang sa automated counting machines, reprinting sa mga balota, pagbansay sa Electoral Board Members, ug uban pang logistical requirements.
