Ang labing karaan nga nahibal-an nga papan nga bato nga gisulatan sa Napulo ka Sugo alang sa subasta.
Ang tipik sa bato gibanabana nga gikan sa 300 ngadto sa 800 AD, gatusan ka tuig human nabuhi si Jesu-Kristo.
Kini usa ka marmol nga slab ug may gibug-aton nga 52 kls.
Ang Napulo ka Sugo gisulat sa Paleo-Hebreo nga script, ang sistema sa pagsulat nga gigamit sa panguna sa biblikanhong mga gingharian sa Israel.
Matod sa Sotheby’s auction house, ang subasta ipahigayon karong Disyembre 18, 2024. Aduna kini inisyal nga presyo nga $1 – $2 million (P116 million) apan gipaabot nga mosaka pa kini.
Matod ni Richard Austin, ang pangulo sa Books & Manuscripts ni Sotheby, naundan kini sa Napulo ka Sugo sa Diyos nga giila sa Kristiyano ug Hudiyong tradisyon, gawas sa usa ka sugo.
Kay ang ikatulong sugo wala masulat dinhi: ‘Ayaw gamita ang ngalan sa Diyos nga walay kaayohan’.
Apan ang bag-ong sugo gisulat dinhi aron sa pagsimba didto sa Bukid sa Gerizim, usa ka balaang dapit nga giila sa bibliya diin ang mga Israelita naghimo sa ilang mga seremonyas sa panalangin human sila maluwas gikan sa Ehipto ngadto sa ‘Promise Land’
Kini unang nakubkoban sa habagatang baybayon sa Israel niadtong 1913 ug ang makasaysayanhong kahulogan niini wala dayon mailhi.
Gigamit pa gani kini ingong ‘paving stone’ sa usa ka balay sa Israel hangtod sa 1943. Sa ulahi, usa ka eskolar ang nakakita niini ug nagtino sa bili niini.
