Gipaklaro sa state weather bureau nga bisan og kusog ang pagbundak sa ulan nga namatikdan sa Quezon City niadtong Lunes, dili kini parehas sa pag-ulan sa dihang miigo ang Bagyong Ondoy niadtong 2009
Base sa Science Garden Station sa weather bureau, nakarekord ang Quezon City og 201.7 millimeters (mm) nga ulan gikan alas-9:00 sa buntag hangtod alas-2:00 sa hapon niadtong Lunes.
Kung itandi sa pagpanalasa sa Bagyong Ondoy sulod sa 24 oras, nakarekord ang maong estasyon og 455 mm nga ulan.
Matud pa ni weather bureau Administrator Nathaniel Servando, padayon ug bug-at ang pag-ulan sulod sa unom ka oras atol sa kasukwahi sa Ondoy, diin nakarekord og 341 mm nga ulan sa QC sulod sa unom ka oras.
Giila usab ni Servando nga nakasinati og “surge” sa pag-ulan niadtong Lunes, diin miabot sa punto nga bug-at ang pagbundak sa ulan sulod sa gitawag nga five-hour window. Bisan og mihupay kini pagkahuman sa usa ka oras, namatikdan na usab ang laing surge sa pag-ulan pasado alas-2:00 sa hapon.
Niadtong Lunes, nalubog sa taas nga baha ang pipila ka mga kalsada sa Metro Manila tungod sa kusog nga pagbundak sa ulan nga dala sa Habagat o southwest monsoon.
Gibanabana usab sa weather bureau nga magpadayon ang pag-ulan nga dala sa Habagat sa daghang lugar sa nasod, ilabina sa Luzon ug Western Visayas.
May kalabotan niini, gihangyo ang publiko nga mag-amping batok sa posibleng pagbaha ug paghugno sa yuta.
