Nagpahibalo ang Department of Education (DepEd) nga ang kakuwang sa classrooms sa tibuok nasod nagpabiling 165,000 ug kini gipaabot nga makaapekto sa pagbukas sa School Year 2025-2026 karong Hunyo 16.
Matod ni DepEd Secretary Sonny Angara niadtong Lunes, tungod sa kakuwang sa mga classroom, posibleng ipatuman na usab ang double o triple shifting sa pipila ka mga pampublikong tunghaan.
Dugang niya nga ang kasamtangang budget dili dayon makatubag sa kakuwang sa classroom nga nasinati.
Gihatagan og gibug-aton ni Angara nga ang pakigtambayayong sa DepEd, sama sa pakigtambayayong niini sa Generation Hope, makatabang sa pagsulbad sa kakuwang ug pagpadali sa pagtukod sa mga classrooms.
Ubos sa 2025 General Appropriations Act (GAA), P28 bilyones ang gigahin sa DepEd budget alang sa basic education facilities, lakip ang P7.18 bilyones alang sa pagtukod ug bag-ong mga edipisyo alang sa kindergarten, elementarya, ug sekondarya.
