Padayong nagpakita og mga timailhan sa pagkaayo ang Queen of All Media nga si Kris Aquino sa iyang pakigbisog sa autoimmune disease, matod sa suod nga higala ni Kris nga si Dindo Balares.
Sa usa ka post sa social media, gipaambit ni Balares ang mga hulagway sa aktres nga bisan og naglisod siya sa mga yanong buluhaton sama sa pagbarog, naningkamot gihapon nga mahimong independente.
Gipaambit usab niya nga makapila ka higayon nga natumba si Kris tungod kay naningkamot siya nga mag-inusara.
Ingon man nga nakadayeg kini sa desisyon ni Kris nga mopuyo sa usa ka pribadong beach resort, diin matod pa niya nakatabang sa hinay-hinay nga pagkaayo.
Mipakita sab og kausaban ang timbang ni Kris, gikan sa 82 pounds niadtong Enero karong tuiga, nahimo na kining 112 pounds, timailhan nga maayo na ang iyang kahimtang.
Nagpasalamat si Balares sa mga padayong nag-ampo alang sa kahimsog ni Kris, ug giklaro niya nga dili tinuod ang mga impormasyon nga mikatap nga aduna siyay cancer.
