Mobalik sa Pilipinas ang South Korean K-pop girl group nga Everglow alang sa ilang “RE: CODE” World Tour karong Agosto.
Sumala sa organizer nga YJ Partners, ipahigayon ang ilang concert sa Agosto 21 sa New Frontier Theater sa Quezon City.
Kabahin ang maong konsiyerto sa promosyon sa ilang extended play nga CODE nga gipagawas niadtong Marso ug nagtimaan sa bag-ong hugna sa grupo isip upat na lamang ka miyembro nga sila E:U, Sihyeon, Onda ug Aisha.
Kini ang ilang ikaduhang pagbisita sa Pilipinas human sa ilang pasundayag sa Mall of Asia Arena niadtong Nobyembre 2022.
Nailhan ang Everglow pinaagi sa ilang “girl crush” concept ug sa mga hit nga kanta sama sa Bon Bon Chocolat, La Di Da ug Pirate. Sa pagkakaron, wala pa gipahibalo sa organizer ang presyo sa mga tiket alang sa maong konsiyerto.
