GENERAL SANTOS CITY – Nakig-alayon ang San Isidro Police Station sa Bureau of Immigration (BI) sa GenSan human nga gidakop ang Korean national ug misis niini tungod sa kasong pagpangabus.
Nadakpan ang magtiayon nga silang Hyo Sung Lee, 44-anyos, nanag-iya sa usa ka Korean food mart ug misis nga si Maribel, 32-anyos pinasubay sa warrant of arrest sa upat ka ihap sa kasong lugos og act of lasciviousness.
Matud ni PCapt. Ulf Tabucon, hepe sa nahisgutang presinto nga ang reklamante sa kaso batok sa magtiayon mao ang ilang menor de edad nga katabang.
Gikaingong ginapatagay ang biktima og ilimnong makahubog ug didto na ginahilabtan sa Koreano og nasayod ang misis niini.
Samtang gibutyag ni Captain Tabucon nga si Maribel ang kanhi nang nahimong punting sa pagpangronda sa kapulisan niadtong 2020 tungod sa P5.5 million nga kantidad sa ukay-ukay.
Walay girekomendang pyansa ang korte sa kasong pagpanglugos samtang P200,000 ang pyansa sa kasong act of lasciviousness.
Sa pamahayag sa opisyal, gikonsidera nga top 7 most wanted person sa San Isidro Police station ang mag-asawa human gipagawas kaniadtong Agosto 19 karong tuiga sa korte ang ilang warrant of arrest.
