GENERAL SANTOS CITY– Kustodiya karon sa Makar Police Station ang usa ka Konsehal sa Brgy. Malakayo Tboli South Cotabato human nagpabuto og pusil sa Sitio Paopao Brgy Sinawal ning dakbayan.
Giila ang nasampit nga si Marsines Kambal Biwang, hamtong ang pangidaron nga residente sa Tboli. Giila ang biktima nga si Tita Walok Sakawari, 45 anyos nga taga Malakayo Tboli.
Gikabutyag nga miadto sa bunkhouse sulod sa banana plantation sa Sitio Paopao ang nasampit konsehal og gipangutana ang biktima kung may kasayuran kung asa ang iyang asawa.
Gikasuko sa konsehal ang wala pagpanumbaling kaniya sa biktima hinungdan nga mibunot og armas gikan sa sling bag og nagpabuto punting sa taas nga bahin.
Nakapangayo og tabang ang biktima hinungdan nga girespondihan sa ginsakpan sa City Mobile Force Company nga nagresulta sa pagkasikop sa konsehal og narekober kaniya ang 45 caliber pistol nga adunay tulo ka buhing bala, usa ka fired cartridge og Fired Bullet sa nasampit nga pusil.
Giandam na ang otoridad ang kasong paglapas sa RA 10591 kon illegal possession of firearms nga ipasang-at batuk sa suspek.
