GENERAL SANTOS CITY – Gikwestyon karon sa usa ka Konsehal dinhi sa Dakbayan sa Heneral Santos ang pagpa-myembro sa kooperatiba una hatagan og prangkisa.
Sumala ni City Councilor Jose Edmar Yumang, ang pag-angkon ug prangkisa ang makonsiderang prebilihiyo sa tanan ug dili angayan nga i-agi ug pugsanay.
Gibutyag niini, may transportation code na nga na-aprubahan sa hawanan sa konseho kung asa upat ka cluster ang mga tricycle.
Ilalom sa maong transportation code, kung asa nalakip ang mga tricycle, sa maong mga lugar lang usab sila pwedeng mamasahero.
Gani, si Kagawad Jun Lagare maoy chairman sa komitiba sa transportasyon dihang kini gi-aprubahan.
Gikadugang sa konsehal subay sa transportation code sa Dakbayan, wala nabutang nga kinahanglang pugson ang mga operator nga mu-apil sa usa ka kooperatiba aron mahatagan ug prangkisa.
Kini matud pa ang makonsiderang pagsupak sa konstitusyon gumikan walay katungod ang Gobyerno nga mamugos hilabina kung kini supak sa personal nga katungod sa usa ka indibidwal.
Sa karon, gihimong kooperatiba ni Kagawad Lagare ang mga tricycle ug inay nga upat ka cluster tulo nalang ka mga kooperatiba nga mao ang red, white ug apple green ang mamahimo unya nga mamasada sa Syudad.
