GENSAN- Gipadayag ni Professor Andy Villa sa Mindanao State University nga panahon na aron maghimo ang Kongreso og mas klaro nga balaod bahin sa paggamit ug pag-apod-apod sa pondo sa gobyerno aron malikayan ang pag-abuso.
Matud ni Villa, dugay nang nagpatuman og nagkadaiyang anti-corruption drive ang mga administrasyon, apan padayon gihapon ang mga alegasyon sa korapsyon sa gobyerno.
Iyang gitandi ang korapsyon sa usa ka virus nga bisan pa og sulbaron sa usa ka bahin, motunga gihapon sa laing dapit kung dili mahatagan og kinatibuk-ang solusyon.
Sumala kaniya, gikinahanglan ang dakong overhaul sa sistema ug dili lamang temporaryong mga programa matag administrasyon.
Gihisgutan usab ni Villa ang kontrobersiya sa flood control projects nga giingong nalambigit sa korapsyon, ug ang kabalaka sa katawhan kung malikayan ba ang susamang problema sa umaabot nga budget allocation.
Dugang pa niya nga kinahanglan patas ug klaro ang sumbanan sa tanan aron dili magka-iyahay ang pagpatuman sa balaod ug paggamit sa pondo sa gobyerno.
