GENERAL SANTOS CITY – Angol ang usa ka kolektor sa usa ka kasa, human gipusil sa riding in tandem.
Sa report gikan sa Pendatun Police Station, natigayon matud pa ang insidente alas 6:15 sa gabii, Huwebes, sa Marang St. kanto Rosa St, Brgy Dadiangas South ning siyudad, kung asa ang biktima giilang si Dayson Jade Sigarra, 20-anyos, residente sa San Pedro St, Brgy Lagao.
Sa imbestigasyon, nag-inum matud pa sa nasampit nga lugar ang biktima kauban ang mga higala.
Kalit matud pang miabot ang usa ka XRM 125 nga motorsiklo sakay ang duha ka lalaki, dayon gipusil ang biktima, samtang nanagan ang iyang mga higala tungod sa kahadlok.
Duha ka mga samad-pinusilan sa lawas ang naangkon sa biktima hinungdan nga gidala sa balay-tambalanan.
Gikabutyag nga caliber 45 pistol ang gigamit sa suspek nga nagsul-ob matud pa ug itum nga jacket ug naka-face mask.
Giimbestigahan pa sa kapulisan ang nasampit nga insidente.
