GENSAN- Suspendido ang klase ug trabaho alang sa tanang ‘teaching ug non-teaching personnel’ sa pampubliko ug pribadong mga tulunghaan sa tanang lebel sa General Santos City karong Lunes, Oktubre 5, 2026.
Kini human mipagawas si City Mayor Lorelie Geronimo Pacquiao sa Executive Order No. 54, Series of 2026, isip pag-ila ug paghatag og pasidungog sa mga magtutudlo ug kawani alang sa ilang kontribusyon sa mga kalihokan kalabot sa World Teachers’ Day.
Sumala sa maong ‘executive order’, gitumong ang maong deklarasyon nga mahatagan og panahon ang mga magtutudlo ug personnel nga makapahulay ug makagahin og kalidad nga oras uban sa ilang pamilya human sa mga kalihokan alang sa maong pagsaulog.
Gipirmahan ni Mayor Pacquiao ang maong mando kagahapon, Oktubre 2, 2026, ug gipahibalo usab ang Department of Education-General Santos City Division, Commission on Higher Education Regional Office, ug uban pang hingtungdang institusyon sa edukasyon alang sa hapsay nga pagpatuman sa deklarasyon.
