GENSAN – Gipahinumduman ni Police Colonel Nicomedes Olaivar Jr., City Director sa GSCPO ang tanang sakop sa kapulisan nga likayan ang bisan unsang binuhatan nga makadaot sa ilang kaugalingon ug sa dungog sa organisasyon, kay sila mamahimong kasuhan og administratibo ug posibleng mapalagpot sa serbisyo.
Ang pamahayag gipagawas isip hugot nga pahimangno sa tanang personnel, ilabi na nga adunay pipila nga nakalapas sa miaging panahon, nga dili angayan makiglambigit sa pag-inom, sugal ug labaw sa tanan ang iligal nga pagpabuto sa ilang mga pusil nga iya sa gobyerno, ug gipasiugda nga sa sunod tuig sigurado nga tangtangon sa serbisyo ang kinsang musupak niini.
Dugang pa, nga hugot nga ginamonitor pag-ayo ang mga lihok sa kapulisan pinaagi sa intelihensiya sa nagkalain-laing yunit aron masiguro nga matuman gyud ang mga kamanduan ug mapadayon ang disiplina sulod sa hanay sa kapulisan.
