Nag-“I do” ang kanhi child aktress nga si Kiray Celis ug ang iyahang uyab nga si Stephan Estopia sa Shrine of St. Therese, Newport kagahapong adlawa Disyembre 13. Nagsul-ob si Kiray og naggilakgilak nga taas nga puti nga gown nga haom kaayo sa puti nga suit ni Stephan.
Ang mga litrato nagpakita sa elegante nga tema sa kasal, nga puno sa bulawan ug abohon, gikan sa mga dekorasyon hangtod sa sinina sa mga bisita.
Daghan ang mga bisita sa kasal kay ang ilang mga principal sponsors naglakip nila ni Dingdong Dantes, Marian Rivera, Gary Valenciano, Ogie Alcasid, Vice Ganda, Maricel Soriano, Boy Abunda, ug pipila ka mga politiko sama nila ni Senador Bong Go, Manila Mayor Isko Moreno Domagoso, ug Chavit Singson.
Si Enchong Dee ang groomsman, samtang sila si Xyriel Manabat, Yen Santos, Arci Muñoz, Gigi de Lana, ug Winwyn Marquez ang mga bridesmaids.
Wala kapugngi ni Kiray ang paghilak samtang gibasa ang iyang mga panaad kang Stephan.
Human sa kasal sa simbahan, ang reception gipahigayon sa Sheraton Manila Hotel ug Newport World Resorts sa Pasay City.
