GENERAL SANTOS CITY – Gipasalig ni Engr. Francisco Provido, labaw sa City Engineers Office, ang pagpahigayon ug imbestigasyon sa gikataho nga pagpangawat ug pipila ka ligid sulod sa ilang buhatan.
Sa pakighinabi sa Bombo Radyo, gibutyag ni Engr. Provido nga gipaabot pa niya ang report gikan sa CSU, nga maoy pagabasehan sa ipahigayon ug imbestigasyon.
Apan isip delicadeza, mag-inhibit matud pa siya sa pagpahigayon ug pag-imbestiga, gumikan susama sila ug apelyido sa driver nga gireklamo,
Hinungdan nga gitugyan na lamang niya ang pagpanguna sa imbestigasyon ngadto sa iyang assistant.
Dungan niini, giangkon usab ni Provido nga aduna nay pipila ka mga empleyado sa ilang buhatan ang gitangtang tungod sa mga anomalya ug dautang hinimuan, hilabi na sa mga nangaging administrasyon.
Samtang, galaum si Provido nga dili na masubli ang mga susamang panghitabo, gumikan sa gihimong pagtaod ug 32 ka mga CCTV cameras sa nagkalain-laing strategic area sa CEO compound, katambayayong sa mga gabantay nga sakop sa CSU.
