GENSAN- Kinahanglanon ang life style check aron masuta ang tinuod nga gigikanan sa kwarta sa mga opisyal nga nalambigit sa kickback sa flood control project.
Gipadayag ni Prof. Mayong Aguja sa MSU Gensan human nga misulti sila Sen. Jinggoy Estrada ug Sen. Joel Villanueva nga andam kini mopirma og waiver aron ipakita ang sulod sa ilang bank accounts, human malambigit sa isyu sa kickback sa flood control project.
Gipasabot sa propesor nga pinaagi sa lifestyle check makita kon asa gikan ang kwarta, nganong taas ang standard of living, ug kon nganong adunay dagkong kabtangan sama sa balay ug sakyanan.
Dugang pa niya, bisan og posibleng walay makita sa bank accounts tungod kay dili tanan transaksyon moagi niini, importante gihapon ang lifestyle check kay obligado ang opisyal nga ipakita ug depensahan ang gigikanan sa ilang mga assets.
Matod pa ni Prof. Mayong, kon dili kini kaya e-cover sa ilang sweldo, posible nga gikan kini sa lain nga tinubdan nga angay susihon.
