Nagpadayon ang normal nga panginabuhi sa mga residente sa United Arab Emirates bisan pa sa bag-ong hulga gikan sa Estados Unidos batok sa Iran.
Gikatahong nga posibleng bombahan sa Amerika ang mga planta sa kuryente sa Iran kon dili kini moabli sa Strait of Hormuz sulod sa 48 ka oras.
Matud ni Charmene Pancho, Bombo International Correspondent sa UAE, nagpabiling kalmado ang sitwasyon sa maong nasud ug padayon gihapon ang adlaw-adlaw nga kalihokan sa katawhan.
Dugang pa niya, bisan unsa pa man ang mahimong mahitabo, nagsalig ang mga residente sa gobyerno sa UAE, ilabi na sa ilang pasalig nga masiguro ang kaluwasan sa publiko ug walay angay kabalak-an sa kasamtangang tensyon sa rehiyon.
Padayon nga gibantayan sa mga awtoridad ang kahimtang samtang naghulat sa posibleng kalamboan sa sitwasyon sa Middle East.
