Mapasalamaton ang South Korean actor nga si Kim Soo-hyun sa padayong gugma ug suporta nga iyang nadawat gikan sa iyang mga Filipino fans.
Gipahayag kini ni Soo-hyun atol sa press conference sa Manila, usa ka adlaw sa wala pa ang iyang fan meeting nga “Our Forever With You” sa Mall of Asia Arena.
Matod sa 38-anyos nga aktor, dako ang iyang pagpasalamat sa mga fans nga dugay nang nagpadayon sa pagsuporta kaniya.
Nasaksihan mismo ni Soo-hyun ang maong suporta sa iyang pag-abot sa Manila, diin giabiabi siya sa mga fans sa airport pinaagi sa pagsinggit, pagbayaw ug uban pang pagpadayag sa ilang kalipay.
Gipaabot usab sa aktor ang iyang fan meeting tungod kay nadungog niyang adunay giandam nga espesyal nga ‘segment’ ang iyang mga fans alang kaniya.
Ang “Our Forever With You” mao ang pinakabag-o niyang fan meeting sa Pilipinas human sa iyang “Eyes On You” Asia tour sa Araneta Coliseum niadtong Hunyo 2024.
Nahimo usab kining usa pa ka lakang sa iyang pagbalik sa publiko human sa kapin usa ka tuig nga pagpalayo sa ‘spotlight’ tungod sa mga alegasyon nga nakig-date siya kaniadto sa mipanaw nang aktres nga si Kim Sae-ron samtang menor de edad pa kini.
Ang maong alegasyon nga iyang gilimod ug sa ulahi wala gipadayon sa kapulisan tungod sa kakulang sa ebidensya.
