Gihangyo ni Lanao del Sur Rep. Zia Alonto Adiong sa National Bureau of Investigation (NBI) nga imbestigahan ang pamahayag ni kanhi Pangulong Rodrigo Roa Duterte kalabutan sa pagpatay sa 15 ka senador aron nga makalingkod sa senado ang iyang mga kandidato.
Matud pa kang Adiong nga kung naglusad og imbestigasyon ang NBI sa bahad ni Vice President Sara Duterte batok kang Pangulong Ferdinand Marcos Jr., First Lady Liza Araneta-Marcos, og Speaker Ferdinand Martin Romualdez, angayang mao usab ang himoon sa pamahayag sa kanhi pangulo.
Sa usa ka panagtigum sa San Juan City, nagmulong si Duterte kalabutan sa nagkaduol nga election og sa kasamtangang komposisyon sa senado.
Nagsugyot siya og radikal nga pamaagi aron nga masiguro nga magdaog ang iyang mga kaalyadong kandidato.
Sa iyang pamahayag, kusog ang singgit gikan sa mga suporters niini nga dungan nga gasinggit nga “Kill! Kill! Kill!”
Gihingusgan ni Adiong nga dili angayang balewalaon ang maong pamahayag ilabi pa nga may higayon nga gihimo ni Duterte ang mga gipangsulti niini.
Gikadugang pa sa maong magbabalaod nga bisag ihingusgan ni Duterte nga komedya ang iyang mga gisulti apan dili pwede nga ipaagi sa joke ang bahad sa mga senador.
Gumikan niini giawhag niya ang NBI nga imbestigahan ang maong statment ilabi pa nga may kalabutan sa kagubot nga wala nahisubay sa balaod
