Gipusil ang self-confessed drug lord nga si Rolan ‘Kerwin’ Espinosa kagahapon Huwebes, Abril 10, 2025, samtang namulong atol sa iyang kampanya sa Barangay Tinag-an Albuera, Leyte.
Kini ang gikumpirma ni Albuera Councilor aspirant Carl Kevin Batistis. Base sa impormasyon nga nakalap sa Bombo Radyo Tacloban, nagtipon sa covered court ang bilog nga slate ni Espinosa kauban sa mga residente sa Barangay sa nahitabo ang insidente.
Daling gidala sa Ormoc Doctor Hospital si Espinosa, kauban ang usa ka menor de edad nga nalambigit sa insidente.
Sa laing bahin, anaa na sa crime scene ang Albuera PNP ug kasamtangang nagpahigayon og makuting imbestigasyon ug hot pursuit operation batok sa mga responsable.
Si Espinosa sa laing bahin nakahukom nga modagan pagka mayor batok kang incumbent Mayor Sixto Dela Victoria ubos sa Bando Espinosa-Pundok Kausaban (BE-PK) party.
Niabot ang iyang kandidatura human siya nakagawas sa prisohan dihang gibasura sa Regional Trial Court sa Baybay City ang kaso batok kaniya tungod sa kakuwang sa ebidensya.
Kahinumduman nga nahimong kabahin sa kontrobersiya si Kerwin Espinosa niadtong 2016 dihang gilambigit siya ni kanhi Presidente Rodrigo Duterte sa illegal drug trade sa Eastern Visayas.
Si Espinosa ug iyang amahan nga si Rolando Espinosa Sr., kanhi mayor sa Albuera, gipasanginlan nga nalambigit sa narcotics trade human sa pagronda sa kapulisan nga nakuhaan og P11 milyones nga kantidad sa shabu duol sa ilang balay.
Si Rolando Espinosa Sr. ni-surrender niadtong tunga-tunga sa 2016 apan napatay sulod sa iyang selda sa Baybay City Jail.
