GENERAL SANTOS CITY – Posibleng mapugos si Coach Steve Kerr nga padulaon na si Kevin Durant sa Game 4 ug mga musunod pang dula sa NBA Finals.
Kini ang gibutyag sa beteranong sports writer ug analyst nga si Fred Lumba, sa pakighinabi sa Bombo Radyo GenSan.
Human kini gipaulawan sa Toronto Raptors ang two-time defending champion Golden State Warriors atubangan mismo sa ilang fans sa Game 3 nga gipahigayon sa ilang homecourt.
Matud kang Lumba, dili imposibleng subling mapildi ang team ni Stephen Curry kung siya lamang ang mamuntos ug mulihok sa Game 4, hilabi na nga tataw nga uhaw gayud sa kadaugan ug siguradong dili gayud magpapildi ang Raptors.
Taas-taas na usab matud pa ang pahulay ni Durant hinungdan nga dako ang posibilidad nga padulaon na kini ni Coach Kerr, aron makabawi ug makuha ang Game 4 ug makatabla sa serye, 2-2.
