Gipaambit ni House Deputy Majority Leader ug La Union Rep. Paolo Ortega V ang bag-ong pangalan nga nakadawat ug confidential funds gikan sa Office of the Vice President (OVP) ug sa Department of Education.
Pipila sa mga listahan nga gisulat mao ang mga apelyido nga “Magellan”, “Fionas” ug “Ewan”.
Ang magbabalaod midugang nga ang mga pangalan sama nila ni Honeylet Camille Sy, Feonna Biong, Feonna Villegas, ug Joel Linangan mga benepisyaryo sa P500 milyones nga confidential funds sa OVP.
Samtang ang mga ngalan nila ni Fiona Ranitez, Erwin Q. Ewan, Ellen Magellan, Gary Tanada nakadawat og bahin sa P112.5 milyones nga confidential fund gikan sa DepEd.
Ang maong mga ngalan walay opisyal nga petsa sa pagkatawo, kasal, o petsa sa kamatayon gikan sa Philippine Statistics Authority.
Gitataw ni Ortega nga dili na kataw-anan ang mga ngalan nga ilang nadiskubrehan tungod kay nagpakita kini kung unsa ka seryuso ang gobyerno sa pag-apod-apod sa kuwarta sa katawhan.
Kahinumdoman nga niadtong Disyembre sa miaging tuig, ang House Committee on good government and public accountability nisumiter nga 1,992 ka indibidwal ang nalambigit sa dili hustong paggamit sa confidential information sa OVP.
Base usab sa panukiduki sa PSA, 670 sa 1,992 ka ngalan ang motakdo sa PSA record. Samtang 1,322 niini ang walay birth records, 1,456 ang way marriage records ug 1,593 ang way death records.
