GENSAN – Giawhag ni Dr. Sara Jane T. Manilay, usa ka deboto sa Poong Jesus Nazareno, ang tanang katawhan sa dakbayan nga muduyog sa ipahigayon karong adlawa, Enero 9, nga prusisyon sa imahen ni Nazareno nga ikaduhang tuig na nga giorganisa sa ilang pamilya.
Gibutyag ni Dr. Manilay nga karong adlawa ipahigayon ang misa sa P. Acharon Boulevard sa eskwelahan nila sa Goldenstate College, nga sundan dayon sa prusisyon.
Ang ruta magsugod sa Acharon Boulevard, padulong sa Pioneer Avenue, Roxas Avenue, City Hall, National Highway, Barangay City Heights, dayon moagi sa St. Michael Church, Mabuhay Road, Nuñez Street, ug mobalik sa kapilya sa ilang ancestral home sa Purok Malakas, Barangay San Isidro.
Gibutyag pa ni Dr. Manilay nga dugay na kining pagtuo ug panata sa ilang pamilya, nga gusto usab nilang ipaambit sa katawhan nga gustong mopadayag sa ilang debosyon ngadto sa Poong Jesus Nazareno.
