GENERAL SANTOS CITY – Suportado ni City Councilor Edmar Yumang ang direktiba ni Gensan City PNP Director PCol. Aden Lagradante nga mag-explain ang mga Chief of police nganong nabasura ang mga kaso nga gipasang-at batuk sa nadakpan nga mga tawo nga gikabutyag nga mga scammers.
Matud kang Kag. Yumang, ma-dismiss ang usa ka kaso kung walay basehan o kwestyunable ang pagdakop.
Gatuo ang nasampit nga opisyal nga may nakit-an ng buslot ang korte hinungdan nga gibasura ang kaso.
Apan kung na-dismiss man ang mga kaso kontra sa mga investment scammers, dili kini maingon nga ‘failure’ tungod mahimo gihapon nga ire-file o subli nga ipasang-at ang kaso ngadto sa korte.
Samtang gatuo si Kag. Yumang nga dili ‘moro-moro’ ang nahitabo tungod nakit-an niini nga ang kapulisan sa dakbayan ang seryoso sa pagsumpo sa investment scam sa syudad og dili usab gusto nga mailad pa pag-usab ang mga katawhan.
Kahinumduman nga sa nakalabay nga mga adlaw nakadakop ang Bula Police Station og San Isidro Police Station og mga tao nga gikaingon nga mga scammers kung asa sa lima ka kaso nga gipasang-at sa korte, tulo matud pa ang na-dismiss.
