Misaka na sa 7,000 ang ihap sa mga kaso sa Ebola virus sa Democratic Republic of the Congo o DRC, diin kini gitawag nga labing grabe nga ‘outbreak’ sa maong sakit sa ilang kasaysayan, base sa lokal nga pangagamhanan sa Congo.
Gikan sa 7,022 ka aktibong kaso sa Ebola, 3,398 ang gikatahong namatay samtang 837 ka mga pasyente ang padayon nga gitambalan. Ang maong outbreak tungod sa Bundibugyo variant sa virus ug mao na kini ang ika-17 nga epidemya sa Ebola sa nasod, nga nagsugod sa amihanang-sidlakang bahin sa Ituri Province sa DRC.
Gikataho usab nga mikaylap ang virus sa pipila ka rehiyon sa nasod, ilabina sa mga lugar nga adunay presensya sa mga armadong grupo, diin limitado ang kapasidad sa mga ospital ug lokal nga pangagamhanan.
Gibanabana nga mokabat na sa 15,000 ka mga tawo ang namatay tungod sa Ebola sa Africa sulod sa milabay nga lima ka dekada.
Makatakod kini pinaagi sa direktang kontak sa ‘bodily fluids’ sa natakdan nga tawo ug mahimong hinungdan sa grabe nga ‘internal ug external bleeding ‘ ingon man ‘organ failure’.
Sa pagkakaron, wala pay aprubadong tambal o bakuna batok sa Ebola, apan padayon ang panukiduki sa mga eksperto aron makapalambo og epektibong pamaagi sa pagtambal ug pagpugong sa maong sakit.
