GENERAL SANTOS CITY-Dul-an na sa dos mil ang natala nga kaso sa dengue dinhi sa dakbayan.
Base kini sa datos gikan sa City Epidemiology Surveillance Unit sa City Health Office, kung asa mukabat matud pa sa kinatibuk-ang 1,947 ka kaso ang natala sa naasoy’ng sakit, gikan Enero hangtod Nobyembre 25.
Gikan sa naasoy’ng ihap, walo na matud pa ang namatay.
Gikabutyag nga mikunhod ug 31 percent ang kaso sa dengue ning tuiga, itandi sa susamang period kaniadtong 2016.
Nasayran nga nanguna ang Brgy Calumpang sa labing daghang natala nga kaso sa dengue nga may 247 ka kaso, kon 13 percent sa kinatibuk-ang ihap nga natala sa tibuok siyudad.
Ikaduha ang Brgy Lagao nga may 228, Brgy San Isidro nga adunay 195, Brgy Fatima nga may 190 ka kaso, ug Labangal nga may 181 ka dengue cases.
Sulod usab sa top 10 ang Brgy Bula nga may 136 ka kaso; Apopong-123, City Heights-82, Mabuhay-76, ug Katangawan-75.
Samtang labing ubos nga ihap sa dengue cases ang natala sa Brgy Upper Labay nga adunay 5 ka kaso.
Dungan niini, padayon ang pahinumdum sa CHO ngadto sa publiko nga manglipyo sa palibot sa kanunay aron walay kapuy-an ang mga lamok, ug makalikay sa dengue.
