Mahimong mag-atubang og kasong sedition ang mga indibidwal nga nalambigit sa bangis nga mga aksyong protesta kagahapon sa dakbayan sa Manila.
Kini ang gitug-an ni DILG Secretary Jonvic Remulla kalabot sa mga indibidwal nga nadakpan ug anaa na karon sa kustodiya sa Manila Police District (MPD) ug gisukitsukit.
Si Palace Press Officer USec. Claire Castro niapelar kang Sec. Remulla ug Acting PNP Chief PLt.Gen. Jose Melencio Nartates aron tun-an kung mapasakaan ba og kasong inciting to sedition si kanhi Ilocos Sur Governor Chavit Singson, kinsa matud niya nagdasig sa mga batan-on sa pagsalmot sa protesta.
Matod ni Castro, gihaylo ni Singson ang mga batan-on nga mohunong na sa pag-eskuyla ug moapil sa mga protesta ug iya usab nga gikombinsir ang mga ginikanan nga tugotan ang ilang kabatan-onan nga mobarog alang sa rebolusyon batok sa korapsyon.
Matud pa ni Castro nga gusto sa presidente nga patubagon ang tanang nalambigit sa bangis ug gubot nga mga lihok protesta sa pipila ka bahin sa Metro Manila nga nisangpot sa kapintasan batok sa kapulisan ug sibilyan.
Matud ni Acting PNP Chief Nartatez nga posibleng mapasakaan usab og kasong terorismo o kalapasan sa anti-terrorism act ang mga nagpaluyo sa bangis nga kasamok.
