Gipadayon sa mga magbabalaod sa Pakistan-administered Kashmir ang eleksyon aron makapili sa ilang bag-ong presidente ug mapun-an ang ‘constitutional office’ nga kapin walo ka bulan nang bakante.
Dako ang tsansa nga modaog sa eleksyon ang kandidato sa ruling Pakistan Muslim League-Nawaz nga si Najeeb Naqi Khan batok sa kandidato sa Pakistan People’s Party nga si Chaudhry Latif Akbar, human makuha sa gobyerno ang labaw sa gikinahanglang 27 ka boto.
Gihimo ang botohan bisan pa sa pagkalangan sa opisyal nga iskedyul nga gitakda sa Konstitusyon, human sa pagkamatay sa kanhing presidente nga si Sultan Mehmood Chaudhry niadtong Enero.
Nahimong kontrobersyal ang eleksyon tungod kay nagpabiling bakante ang pito ka pwesto sa lehislatura human gi-postpone ang botohan sa duha ka distrito nga nahimong sentro sa bayolenteng mga protesta ug mga pagpatay.
Sumala ni Chief Election Commissioner Justice Ghulam Mustafa Mughal, pormal ug legal ang proseso sa pagpili bisan pa sa mga bakanteng pwesto aron masulbad ang dugay nang kakulang sa liderato sa rehiyon.
