Ang gikahadlokan kaniadto nga “Pharaoh’s Curse” lagmit maoy nagkupot sa yawi sa pagpakig-batok sa kanser gumikan ang grupo sa mga siyentista gikan sa University of Pennsylvania nakadiskobre nga ang Aspergillus flavus, usa ka matang sa fungus nga makita sa lubnganan sa Ehiptohanong pharaoh nga si Tutankhamun, adunay katakos sa pagpatay sa mga selula sa kanser, ilabina niadtong adunay leukemia.
Sa 1920’s, ang balita kalabutan sa “Pharaoh curse” mikaylap human ang pipila ka mga miyembro sa grupo sa mga arkeologo nga gipangulohan ni Howard Carter nasakit ug namatay human giablihan ang lubnganan ni Tutankhamun.
Ang susamang insidente nahitabo sa Poland niadtong dekada 1970, diin halos tanang tawo nga misulod sa usa ka lubnganan ug nangamatay.
Nadiskobrehan sa ulahi nga ang hinungdan mao ang fungus nga Aspergillus flavus, nga mahimong hinungdan sa grabe nga sakit sa baga. Karon, imbes mahadlok, gitun-an sa mga siyentista kining fungus tungod kay ilang nasuta nga aduna kini abilidad sa pagpatay sa mga selula sa leukemia.
Ang mga eksperto nag-ingon nga kini adunay dakong potensyal nga mahimong basehan sa bag-ong mga matang sa tambal. Matod usab ni Prof. Sherry Gao, usa sa mga nag-unang researcher, adunay daghan pang mga natural nga kahinguhaan ug mga organismo sa kinaiyahan nga mahimong yawe sa bag-ong mga tambal.
Iyang gipasiugda nga ang siyensya adunay dakong papel sa padayon nga pagdiskobre ug pagtuon niini aron makapangita og tambal sa mga sakit.
