GENSAN – Padayon ang kampanya sa mga kapulisan kontra sa illegal mufflers o “Bora Bora,” sumala ni PltCol. Patrich Elma, hepe sa Traffic Enforcement Unit -Gensan.
Sa ilang operasyon kaniadtong Paskohan sa Gensan, nakumpiska sila og kapin sa 70 ka illegal mufflers nga gi-turn over alang sa ceremonial destruction nga gipahigayon kagahapon, Enero 7 sa Camp Fermin G. Lira Oval Ground.
Giingon ni Elma nga ang illegal drag racing ug paggamit sa modified o open pipe mufflers makahatag og peligro sa motorista ug katawhan, makasamok sa mga residente, ug supak sa balaod ug ordinansa sa siyudad.
Gipahimangnoan ang publiko nga ang dalan angay gamiton alang sa luwas ug hapsay nga pagbiyahe, dili isip lugar sa paglumba.
Ang mga makit-an nga naglapas sa regulasyon mahimong mag-atubang og multa, citation, pagkumpiska sa sakyanan, o ubang silot sumala sa balaod.
Gipangayo usab ni Elma ang kooperasyon sa publiko ug ginikanan aron pahimangnoan ang ilang anak sa responsableng paggamit sa sakyanan ug pagsunod sa trapiko alang sa kaluwasan ug kalinaw sa komunidad.
