GENERAL SANTOS CITY – Padayon gihapon ang alert status sa mga kapulisan nga nakadeploy sa nagkadaiyang sementeryo dinhi sa Syudad.
Kini gumikan aduna pay pipila nga gustong moapas aron nga bisitahon ang ilang mga kabanay sa sementeryo luyo nga magsugod usab karung adlawa ang full implementation sa face to face classes sa mga pampublikong tulunghaan.
Gani, padayon gihapon nga miapela si City PNP Director Col. Jomar Alexis Yap sa publiko nga muadto sa mga sementeryo karong adlawa nga magsunod gihapon sa mga patakaran.
Matud pa ni Col. Yap nga angayang magpabiling sundon ang mga minimum health protocols sa sulod sa sementeryo.
Samtang adunay police action center ang kapulisan sa matag sementeryo aron mubantay sa palibot.
Kahibaluan nga daghan na ang mga miadto sa mga nagkadaiyang sementeryo sa miaging adlawng Sabado og Domingo lakip adlawng Lunes tungod dili gusto nga magduyog sa daghang mga tawo nga muadto sa mga sementeryo atol mismo sa adlaw sa kalag-kalag.
Apan ubay-ubay gihapon nga mga katawhan ang mibisita sa ilang mga kabanay kagahapon sa mga nagkadaiyang sam-ang dinhi sa syudad.
