GENSAN- Gipasalig sa General Santos City Police Office nga padayon nilang palig-onon ang seguridad sa mga eskwelahan aron masiguro ang kaluwasan sa mga estudyante ug magtutudlo.
Matod ni PLTCOL. Rexor Jake Canoy, spokesperson sa GSCPO, adunay nagpadayon nga mga diskusyon kabahin sa posibleng pagpahigayon og active shooting drill sa mga eskwelahan.
Apan, giila sa kapulisan nga kinahanglan pag-ampingan ang paagi sa pagpahigayon niini tungod kay posibleng makaapekto o makahatag og trauma sa mga bata, ilabi na kon adunay simulation nga adunay tingog sa pagpamusil.
Bisan pa niini, giingon ni Canoy nga gipalig-on na sa GSCPO ang presensya sa mga pulis sa mga eskwelahan isip kabahin sa ilang commitment sa pagpanalipod sa mga estudyante.
Matud niya, sayo pa lang sa buntag, sa dili pa magsugod ang klase, adunay mga pulis nga gipahimutang na sa mga eskwelahan aron magbantay ug masiguro ang kahapsay ug seguridad.
Mobalik usab ang mga personnel sa mga eskwelahan sa dili pa matapos ang klase.
Dugang pa sa GSCPO nga padayon nilang tun-an ang labing angay nga pamaagi ug mga protocol sa pag-atubang sa posibleng insidente sa kapintasan sulod sa mga eskwelahan, samtang gihatagan og dakong pagtagad ang kaluwasan ug kahimtang sa pangisip sa mga estudyante.
