GENERAL SANTOS CITY – May persons of interest na ang mga ginsakpan sa Polomolok Municipal Police Station sa mga suspek nga namusil kagahapon sa buntag sa Purok 1-A Brgy Landan, Polomolok, South Cotabato.
Kini ang gibutyag sa Bombo Radyo ni Police Chief Inspector Alex Orcajada, hepe sa nasampit nga presinto, luyo nga mibalibad sa paghatag ug dugang nga detalye, alang sa nagpadayon nilang imbestigasyon.
Kahibaluan nga ang mga biktima mao sila si Don Carl Damasco, 40-anyos ug Jerry Congan alias Gapo, 53, managsamang resident sa naasoy’ng lugar.
Ang duruha ang padayong nagpaalim sa pribadong tambalanan dinhi sa siyudad, human nakaangkon ug mga samad-pinusilan sa lawas.
Base matud pa sa inisyal nga imbestigasyon, una ang insidente usa ka pula nga tractor ang miabot sa lugar, sakay ang tulo ka wala mailhi nga tawo.
Pag-abot atubangan sa Damasco Building, gipabuthan matud pa sa mga suspek ang duha ka biktima, nga migawas lang unta aron magkape.
Paspas matud pang misibat ang mga suspek padulong sa kabukiran nga bahin. Usa sa ginatutukan nga anggulo sa kapulisan ang may kalabutan sa personal grudge.
Sa karon nagpadayon ang ginahimo nga hot pursuit operation sa kapulisan alang sa pagkasikop sa mga suspek.
